Beint í leiðarkerfi

Frétt

12.06.2009

Áframhaldandi aðgerðir til að tryggja jafnræði

Stjórn Almenna lífeyrissjóðsins hefur ákveðið í samráði við Fjármálaeftirlitið að framlengja takmörkun á útgreiðslum og flutningum milli ávöxtunarleiða til að tryggja jafnræði sjóðfélaga. Frá því viðskiptabankarnir féllu í október hafa mjög margir sjóðfélagar óskað eftir breytingum á ávöxtunarleið. Þar sem fjárfestingar sjóðsins hafa tekið mið af því að sparnaðurinn væri bundinn til margra ára þýða miklar breytingar að selja verður eignir sem hægt er að breyta í laust fé, einkum ríkisskuldabréf. Ef það yrði gert myndu eignahlutföll breytast hjá þeim sem hyggjast halda áfram að geyma sparnað sinn í viðkomandi ávöxtunarleið. Þess vegna var gripið til þess ráðs að dreifa útborgununum og flutningum á lengri tíma til að tryggja að allir sjóðfélagar sitji við sama borð og til að koma í veg fyrir að eignir rýrni vegna breyttra forsendna. Takmarkanirnar eru:
  • Lífeyrisgreiðslur úr séreignarsjóði verða takmarkaðar við 500.000 kr. á mánuði eða inneign greidd út á með jöfnum mánaðarlegum útborgunum á tímabilinu 1. mars 2009 til 1. október 2010. Lífeyris¬greiðslur verða óbreyttar hjá þeim sem hafa þegar hafið töku lífeyris.
  • Flutningur á inneign milli ávöxtunar¬leiða eða til annarra vörsluaðila verða framkvæmdur með jöfnum greiðslum á tímabilinu 1. mars 2009 til 1. október 2010. Flutningur á inneign hefst í næsta mánuði eftir að beiðni berst.
  • Hámarkslán til sjóðfélaga lækka tímabundið í 10 milljónir.
Takmörkunin er tímabundin og verður endurskoðuð mánaðarlega í samráði við Fjár¬málaeftirlitið. Sjóðurinn mun vinna í að bæta lausafjárstöðuna með sölu eigna án þess þó að breyta hlutföllum milli eignaflokka. Markmiðið er að aflétta þessum takmörkunum við fyrsta tækifæri.
<<Til baka