Frétt

Samkvæmt áformum ríkisstjórnarinnar munu launatekjur umfram 700.000 kr. verða skattlagðar sérstaklega um 8% frá og með 1. júlí 2009, þ.e. svokallaður hátekjuskattur kemur til innheimtu. Skatturinn verður innheimtur mánaðarlega en endurskoðaður í lok árs og þá reiknaður af meðalmánaðartekjum, eða heildartekjum umfram 8,4 milljónir á ári (4,2 milljónir til áramóta 2010).

Fjármagnstekjuskattur verður á sama tíma hækkaður úr 10% í 15% af árlegum fjármagnstekjum. Frítekjumark vegna fjármagnstekna verður 250.000 kr. en var ekkert áður. Fjármagnstekjur verða innheimtar, líkt og áður, þegar ávinnsla fjármagnstekna á sér stað.

Þegar sjóðfélagi tekur ákvörðun um að taka inneign í séreignarsjóði út í einu lagi og umbreyta í hefðbundinn sparnað er fjármagnstekjuskattur með því fyrsta sem veita þarf athygli. Hækkun fjármagnstekjuskatts styrkir enn frekar þá stoð að séreignarsparnaður sé hagstæðasti sparnaðurinn. Af séreignarsparnaði er ekki greiddur fjármagnstekjuskattur líkt og af venjubundnum sparnaði en þegar sparnaðurinn er greiddur út greiða sjóðfélagar tekjuskatt. Það er því mikilvægt að íhuga vandlega hvort taka eigi út séreignarsparnað og taka tillit bæði til tekjuskatts og fjármagnstekjuskatts.

Lesa grein um áhrif skattabreytinga.

Þegar inneign er ávöxtuð á verðtryggðum bankareikningi fylgir hún þróun vísitölu neysluverðs hvort sem er til hækkunar eða lækkunar. Þegar verðhjöðnun á sér stað milli mánaða þá lækkar inneign í samræmi við hana líkt og hún hækkar þegar verðbólga á sér stað. Verðtryggðir bankareikningar eru í flestum tilfellum með lægri vexti en þeir sem eru óverðtryggðir. Skýringin er sú að hluti af óverðtryggðum vöxtum er verðbólguálag til að greiða í staðinn fyrir verðbætur.
Óverðtryggðir reikningar eru ekki bundnir vísitölu og bera því einungis vexti. Undanfarin ár hafa vextir á óverðtryggðum reikningum verið háir en hafa lækkað hratt það sem af er þessu ári.

Eins og verðlag hefur þróast undanfarin ár þá bendir margt til þess að verðtryggðir reikningar gefi betri raunávöxtun til lengri tíma litið. Dregið hefur úr verðbólgu á fyrri hluta þessa árs og gera spár ráð fyrir að tólf mánaða verðbólga í lok þessa árs verði um 6%-8%.

Innlánasafn Almenna lífeyrissjóðsins ávaxtar iðgjöld sjóðfélaga eingöngu á bankareikningum. Lang stærsti hluti þessara bankareikninga eru verðtryggðir reikningar. Við teljum farsælast að lífeyrissparnaður, sem er bundinn til langs tíma, sé ávaxtaður á verðtyggðum bankareikningum. Hér á landi hefur verið viðvarandi verðbólga síðustu áratugi og mikilvægt að sjóðfélagar nýti sér verðtrygginguna til að verja inneign sína fyrir verðbólgu.

Frá því í október 2008 hefur öllum nýjum iðgjöldum í Almenna lífeyrissjóðinn verið ráðstafað í Innlánasafn. Í Innlánasafni eru iðgjöld sjóðfélaga eingöngu ávöxtuð á bankareikningum.

Þessi ráðstöfun iðgjalda nær yfir alla sjóðfélaga og er tímabundin. Stefnt er á hverfa aftur til fyrri ráðstöfunar iðgjalda en ekki hefur verið tekin ákvörðun um hvenær slíkt mun eiga sér stað.
Öllum sjóðfélögum Almenna lífeyrissjóðsins mun verða tilkynnt um þessa breytingu á ráðstöfun með bréfi.

Þess má geta að Almenni lífeyrissjóðurinn býður sjóðfélögum sínum uppá sjö mismunandi leiðir til ráðstöfunar á framtíðariðgjöldum sínum. Hægt er að breyta um ávöxtunarleið með því að skila inn undirrituðu eyðublaði til sjóðsins.

Frá því að Ríkissöfnin voru stofnuð í mars 2009 þá hefur ávöxtunarkrafa ríkisskuldabréfa á markaði lækkað. Þegar ávöxtunarkrafa á markaði lækkar þá hækkar verðgildi skuldabréfanna umfram þá föstu vexti (og verðbætur) sem bréfin bera. Ríkissafn - langt fjárfestir nánast eingöngu í löngum verðtryggðum ríkisskuldabréfum og hefur því hækkað með lækkandi ávöxtunarkröfu verðtryggða skuldabréfa á markaði. Ríkissafn – stutt fjárfestir í stuttum óverðtryggðum ríkisskuldabréfum og getur einnig fjárfest í innlánum banka. Áhrif breytinga ávöxtunarkröfu á markað eru minni á stutta Ríkissafnið, meðaltíminn er styttri og vaxtanæmnin því minni.

Hafa ber í huga að verð ríkisskuldabréfa getur bæði hækkað og lækkað. Sveiflur í stutta Ríkissafninu eru mun minni en í langa Ríkissafninu og það hentar því vel þeim sem vilja lágmarksskuldaraáhættu og hyggjast ganga á inneign sína á næstu 12 mánuðum.