Frétt

Ný fjárfestingarstefna

Stjórn Almenna lífeyrissjóðsins hefur samþykkt nýja fjárfestingarstefnu fyrir sjóðinn fyrir árið 2010. Stefnan er mjög ítarleg og er nokkuð breytt frá fyrri stefnu m.a. vegna efnahagsáfallsins á Íslandi 2008 og 2009. Almenni lífeyrissjóðurinn hefur brugðist við áfallinu með því að að fjölga ávöxtunarleiðum sem fjár­festa í innlánum og ríkisskuldabréfum. Sjóðurinn hefur einnig aukið vægi ríkisskuldabréfa í blönduðum eignasöfnum sjóðsins samhliða því að auka áhættudreifingu með því að lækka hámarksvægi á einstaka útgefendur.

Í fjárfestingarstefnu fyrir árið 2010 eru til viðbótar gerðar eftirfarandi breytingar. 

• Stefnt er að sameiningu Ævisafns IV og Innlánasafns þegar skuldabréf í eigu Ævisafns IV eru uppgreidd eða hægt er að selja bréfin. 
• Samsetning skuldabréfasafna er breytt og vægi ríkisskuldabréfa, skuldabréfa sveitarfélaga og innlána aukið á kostnað annarra skuldabréfa. 
• Erlend ríkisskuldabréf eru nú hluti af blönduðum verðbréfasöfnum. 
• Ákveðið hefur verið að sameina deildir samtryggingarsjóðs. Ný fjárfestingarstefna er fyrir sameinaðan samtryggingarsjóð. 
• Sjóðurinn hefur skilgreint viðmiðanir til hliðsjónar við val á verðbréfum sem eru útgefin af innlendum útgefendum öðrum en ríkinu. Tilgangurinn er að að auka gegnsæi þannig að sjóðfélagar viti hvaða skilyrði sjóðurinn hefur til viðmiðunar við val á öðrum verðbréfum en ríkisskuldabréfum. Í viðmiðunum eru einnig ákvæði um skilmála sem sjóðurinn fer fram á að séu í skuldabréfum fyrirtækja og sveitarfélaga.

Sjóðfélagar geta lesið stefnuna hér. Fjárfestingarstefnan verður kynnt sérstaklega á rabbfundi sem er boðaður 28. janúar.