Frétt

12.03.2010

Yfirlit til sjóðfélaga

Almenni lífeyrissjóðurinn hefur sent sjóðfélögum yfirlit sem sýnir hreyfingar á tímabilinu 1. september til 31. desember 2009 og upplýsingar um lífeyris­réttindi og inneign í lok tímabilsins.

Með yfirlitunum fylgir með bréf með upplýsingum til sjóðfélaga.

Ný og einfaldari pappírsyfirlit / nánari upplýsingar á sjóðfélagavef
Sjóðfélagar fá nú send breytt yfirlit. Yfirlitin eru einfaldari með lágmarksupplýsingum um iðgjalda­greiðslur, inneign í séreignarsjóði og áætlaðan ellilífeyri úr samtryggingarsjóði. Á yfirlitunum er lykilorð að sjóðfélagavef með nánari upplýsingum. Sjóðfélagar eru hvattir til að fara inn á vefinn en þar geta þeir á auðveldan hátt fylgst með og metið stöðu sína.

Sjö söfn hækkuðu árið 2009 en eitt lækkaði
Sjö ávöxtunarleiðir skiluðu jákvæðri ávöxtun árið 2009 en ein var með neikvæða ávöxtun.

• Innlánasafnið hækkaði um 15,2% og Ríkissafn langt um 18,5%. Háir vextir og verð­trygging skýra góða ávöxtun safnanna.
• Samtryggingarsjóður, Ævisafn I og Ævisafn II hækkuðu um 8,6%-14,6%. Hækkun erlendra hlutabréfa og veiking krónunnar skýra hækkun safnanna.
• Sjóður­inn hefur þurft að færa niður skuldabréf innlendra banka og fyrirtækja. Afskriftirnar hafa bitnað mest á Ævisafni III sem lækkaði um 6,4% og Ævisafni IV sem stóð nánast í stað á árinu.
• Á síðustu 20 árum hafa komið tvö tímabil með neikvæðri raunávöxtun. Langtímaraunávöxtun (ávöxtun frá 1990) Ævisafns II er jákvæð um 3,8% og samtryggingarsjóðs um 4,4%.
• Hlutföll verðbréfaflokka í ævisöfnum og samtryggingarsjóði eru nokkuð frá stefnum safnanna einkum vegna gjaldeyrishaftanna.
• Hlutfall ríkistryggðra skuldabréfa, skuldabréf sveitarfélaga og innlána hefur aukist í öllum söfnum.
• Erlend verðbréf skiptast í ríkisskuldabréf, hlutabréf og framtakssjóði. Erlendu hlutabréfin vega þyngst en fjárfest er í rúmlega 1600 fyrirtækjum í mörgum löndum og atvinnugreinum.

Smellið hér til að lesa meira um ávöxtun árið 2009 og eignasamsetningu í árslok.

Árið 2010 fer vel af stað
Ávöxtun það sem af er ári hefur verið ágæt í öllum söfnum. Hækkun á gengi safna Almenna lífeyrissjóðsins frá áramótum er á bilinu 1,0% til 2,0%. Ríkissafn langt hefur hækkað mest.

Hér að neðan er tafla sem sýnir hækkun allra safna lífeyrissjóðsins frá áramótum til 12. mars 2010:

Ævisafn I	Ævisafn II	Ævisafn III	Ævisafn IV	Innlánasafn	Ríkissafn - Langt	Ríkissafn - Stutt
1,0%	1,2%	1,3%	1,5%	1,5%	2,0%	1,4%

Ágæt ávöxtun hefur verið á ríkisskuldabréfum það sem af er ári og hefur það skilað hækkun inn í öll blönduð verðbréfasöfn sjóðsins og Ríkissöfnin. Hækkun er á erlendum hlutabréfum frá áramótum, þó að árið hafi farið illa af stað á erlendum mörkuðum þá varð viðsnúningur þar í febrúar. Töluverðar sveiflur hafa verið á mörkuðum bæði erlendis og hér heima og búast má við því að svo verði áfram.