Frétt

Víkjandi skuldabréf

Vegna fréttar í Morgunblaðinu um víkjandi skuldabréf Glitnis vill Almenni lífeyrissjóðurinn koma á framfæri eftirfarandi upplýsingum.

Um frétt Morgunblaðsins

• Það er rétt sem fram kemur í frétt Morgunblaðsins að Almenni lífeyrissjóðurinn hefur afskrifað víkjandi skuldabréf útgefin af Glitni fyrir um 3 milljarða.
• Skuldabréfin voru keypt á árunum 2000-2008 en ekki öll í útboði Glitnis í mars 2008 eins og Morgunblaðið heldur ranglega fram.

Um víkjandi skuldabréf

• Almenni lífeyrissjóðurinn átti víkjandi skuldabréf á fleiri banka og sparisjóði. Öll víkjandi skuldabréf hafa verið afskrifuð að fullu.
• Algengt var að skuldabréf útgefin af íslenskum lánastofnunum í íslenskum krónum væru víkjandi. Kosturinn við þau fyrir bankann/sparisjóðinn var að víkjandi skuldabréfin voru flokkuð sem hluti af eigin fé. Kosturinn fyrir fjárfesta var að víkjandi skuldabréfin gáfu hærri ávöxtun en hefðbundin skuldabréf.
• Víkjandi skuldabréf má flokka sem verðbréf á milli hefðbundinna skuldabréfa og hlutabréfa. Þau eru aftar í kröfuröðinni en hefðbundin skuldabréf en á undan hlutabréfum.

Útboð Glitnis á víkjandi skuldabréfum í mars 2008

• Heildarfjárhæð útboðsins var 15 milljarðar króna. Lífeyrissjóðir keyptu mest í útboðinu.
• Skuldabréfin báru 8,0% verðtryggða vexti sem áttu að greiðast árlega ásamt verðbótum. Skuldabréfið átti að breytast í hlutabréf 1. apríl 2013 á gengi sem var talið hagstætt fyrir fjárfesta.
• Stjórn Almenna lífeyrissjóðsins ákvað að kaupa skuldabréf fyrir 1,6 milljarða í útboðinu. Á þessum tíma var stefna sjóðsins að undirvigta innlend hlutabréf m.v. fjárfestingarstefnu og taldi sjóðurinn skuldabréfin góðan kost í staðinn fyrir hlutabréf sem voru almennt að falla í verði. 
• Við sölu á skuldabréfunum lágu fyrir upplýsingar sem sýndu sterka fjárhagsstöðu Glitnis. Eiginfjárstaða bankans var sterk og með útboðinu ætlaði bankinn að styrkja hana enn frekar.

 Málaferli lífeyrissjóða

• Lífeyrissjóðir sem keyptu víkjandi skuldabréf í útboði Glitnis í mars 2008 telja nú að upplýsingar um fjárhagsstöðu Glitnis, sem voru kynntar í útboðinu, hafi ekki verið réttar. Sjóðirnir telja að staða bankans hafi verið verið mun verri en upplýsingar í útboðinu gáfu til kynna. Sjö mánuðum síðar féll bankinn. 
• Vegna þess hafa lífeyrissjóðirnir krafist þess að skuldabréfin verði samþykkt sem almenn krafa í þrotabú Glitnis. Verði það ekki samþykkt munu sjóðirnir leita réttar síns fyrir dómstólum.
• Lífeyrissjóðirnir eru einnig að skoða möguleika á að höfða skaðabótamál á hendur stjórn og stjórnendum Glitnis vegna útboðsins. Einnig skoða lífeyrissjóðirnir réttarstöðu sína gagnvart endurskoðendum Glitnis.