Frétt

Ávöxtun á fyrri hluta ársins

Ríkisskuldabréf hækkuðu, erlend hlutabréf lækkuðu
Ávöxtun fyrstu sex mánuði ársins 2010 einkenndist af töluverðum hækkunum á innlendum ríkisskuldabréfum og miklum sveiflum á erlendum hlutabréfamörkuðum.

• Allir flokkar verðtryggðra og óverðtryggðra ríkisskuldabréfa hækkuðu í verði. Lítið framboð af tryggum innlendum fjárfestingakostum ásamt gjaldeyrishöftunum skýra mikla hækkun á verði ríkisskuldabréfa.
• Þrátt fyrir minnkandi verðbólgu, sem nú mælist 5,7%, lækkaði ávöxtunarkrafa á verðtryggðra ríkisskuldabréfa, m.a. vegna lækkandi stýrivaxta og lítils framboðs af öðrum fjárfestingarkostum. Ávöxtunarkrafa verðtryggðra ríkisskuldabréfa er nú um 3,5% en ávöxtunarkrafa stuttra óverðtryggðra skuldabréfa er um 4,2% og um 6% á lengri óverðtryggðum skuldabréfum.
• Þróun ávöxtunarkröfu ríkisskuldabréfa hefur skilað sér í hækkun á gengi skuldabréfasafna Almenna, sjá fyrir neðan. Skuldabréfasöfn blandaðra ávöxtunarleiða hafa einnig notið góðs af þessari þróun.
• Vegna gjaldeyrishafta, lækkandi vaxta og skorts á framboði tryggra fjárfestingakosta bendir margt til þess að ávöxtunarkrafa haldist áfram lág í sögulegu samhengi.
• Heimsvísitala hlutabréfa í USD hefur lækkað um 10,3% það sem af er ári. Erlendir markaðir fóru vel af stað í byrjun árs og hafði heimsvísitalan hækkað um 6% um miðjan apríl en þá tók við lækkunarferli sem á rætur sínar að rekja til vaxandi ótta fjárfesta við efnahagsástand nokkurra Evrópuríkja og skuldastöðu þeirra einkum Grikklandi.

Ríkissöfnin hækkuðu mest
Breytingar á ávöxtunarleiðum sjóðsins á fyrri hluta ársins skýrast af ofangreindri þróun á mörkuðum.

• Ævisafn I lækkaði um 2% á fyrri hluta ársins sem skýrist af þróun á erlendum mörkuðum, bæði lækkunar á hlutabréfum en einnig styrkingu krónunnar gagnvart öðrum gjaldmiðlum.
• Ævisafn II er rétt fyrir ofan núllið í ávöxtun en það skýrist af þróun á erlendum mörkuðum.
• Ævisafn III hækkaði um 1,8% frá áramótum en erlend eign safnsins (10%) dró ávöxtun safnsins  niður.
• Ævisafn IV hækkaði um 4,2%. Safnið er að mestu verðtryggð innlán sem skýrir ágæta ávöxtun safnsins.
• Innlánasafnið hækkaði um 4,5% að mestu vegna umsaminna vaxtakjara á innlánsreikningum en einnig vegna verðbólgu á fyrri hluta ársins þar sem innlánareikningar safnsins er að mestu verðtryggðir.
• Ríkissöfnin hafa notið góðs af mikill kröfulækkun á skuldabréfamarkaði . Ríkissafn langt hækkaði um 7,1% en stutta safnið um 6%.

Áhrif skuldabréfaviðskipta ekki komin fram
Almenni lífeyrissjóðurinn tók þátt í kaupum lífeyrissjóða á ríkisskuldabréfum sem Seðlabanki Íslands eignaðist með samningum við seðlabankann í Lúxemborg vegna dótturfélags landsbankans, Avens B.V., sjá frétt frá 31.05.2010.

• Almenni lífeyrissjóðurinn keypti í skuldabréfapakkanum fyrir 4,7 milljarða sem þýðir að sjóðurinn mun selja um 18-19% af erlendum verðbréfum.
• Ávöxtunarleiðir sem fjárfesta í erlendum verðbréfum eignast bréfin, þ.e. Ævisafn I, Ævisafn II, Ævisafn III og samtryggingarsjóður.
• Vegna hárrar ávöxtunarkröfu í viðskiptunum mun ávöxtun þessara safna hækka auk þess sem tryggingafræðileg staða samtryggingarsjóðs batnar um rúmt 1%.