13.01.2012
Hækkun á öllum ávöxtunarleiðum á árinu 2011
Allar ávöxtunarleiðir séreignarsjóðs og samtryggingarsjóður hækkuðu á árinu.
|
Ríkissafn-langt hækkaði mest
|
Ríkissafn langt hækkaði um 11,9% árið 2011 sem jafngildir um 6,3% raunávöxtun. Eins og síðastliðin ár var mikil eftirspurn eftir verðtryggðum ríkisskuldabréfum vegna takmarkaðs framboðs fjárfestingakosta og mikilli fjárfestingarþörf lífeyrissjóða. Lengri verðtryggð ríkisskuldabréf hækkuðu mest eða um 17,5%.
|
|
Blönduð söfn með jákvæða raunávöxtun
|
Hækkanir á innlendum verðtryggðum ríkisskuldabréfum er meginástæðan fyrir hækkun blandaðra ávöxtunarleiða á árinu. Erlendar eignir drógu úr ávöxtun og gætir þeirra áhrifa mest í Ævisafni I, Ævisafni II og Samtryggingarsjóði. Ævisafn I hækkaði um 6,5%, Ævisafn II um 9,0%, Ævisafn III um 9,8% og Samtryggingarsjóður um 9,7%.
|
|
Ríkissafn-stutt hækkaði lítið
|
Ríkissafn stutt hækkaði um 2,9% árið 2011. Ávöxtunarkrafa á stuttum óverðtryggðum ríkisskuldabréfum var lág á árinu en háir nafnvextir bréfanna skiluðu jákvæðri nafnávöxtun.
|
|
Verðtryggð innlán með ágæta ávöxtun
|
Innlánasafn og Ævisafn IV, sem ávaxta eignir sínar á innlánsreikningum, hækkuðu um 7,8% og um 8,0%. Verðbótaþátturinn skýrir stóran hluta ávöxtunarinnar þar sem verðbólga ársins var 5,2%. Verðtryggð innlán vega um 92% af Innlánasafninu og 98% af Ævisafni IV. Verðtryggðir innlánsvextir innlánasafnsins lækkuðu um 0,5-1% samhliða lækkun ávöxtunarkröfu verðtryggðra ríkisskuldabréfa.
|
(Smelltu á mynd til að stækka)
Fjárfestingarumhverfið einkenndist af lækkandi ávöxtunarkröfu á verðtryggðum skuldabréfum og innlánsvöxtum
|
Verðtryggð ríkisskuldabréf hækkuðu
|
Innlend verðbólga, lækkun á ávöxtunarkröfu og veiking krónunnar réðu mestu um ávöxtun ávöxtunarleiða á árinu 2011. Verðbólga ársins mældist 5,2% en gengishækkun verðtryggðra ríkisskuldabréfa og vaxtaálag á verðtryggðum innlánsreikningum skilaði ávöxtun umfram verðbólgu á árinu í öllum ávöxtunarleiðum að undanskildum stutta Ríkissafninu (óverðtryggðar eignir).
|
|
Óverðtryggð ríkisskuldabréf lækkuðu
|
Peningastefnunefnd Seðlabanka Íslands lækkaði stýrivexti í byrjun árs um 0,25% en hækkaði vextina svo um 0,5% í tveimur skrefum. Stýrivextir voru í árslok 4,75%. Áhrif stýrivaxtahækkana á skuldabréfamarkað komu fram í minni áhuga á óverðtryggðum ríkisskuldabréfum og gengislækkun þeirra á árinu.
|
|
Erlend hlutabréf lækkuðu en krónan veiktist
|
Heimsvísitala hlutabréfa í bandaríkjadollar lækkaði um 5,5% á árinu en íslenska krónan veiktist á árinu um 6,7% gagnvart bandaríkjadollar á sama tíma og hækkuðu erlendra eignir ávöxtunarleiða því í krónum talið. Pólitískir atburðir höfðu mikil áhrif á fjármálamarkaði heimsins á árinu, þar má nefna vandamál Evruríkja við að leysa skuldavanda einstakra sambandsþjóða, uppreisnir mótmælenda gegn valdstjórnum í mið-austurlöndum og lækkun á lánshæfismati Bandaríkjanna vegna mikillar skuldsetningar.
|
|
Óvissa erlendis, fleiri fyrirtæki stefna á markað innanlands
|
Ljóst er að óvissa mun áfram vera ríkjandi á erlendum mörkuðum en innanlands er sjáanleg helst sú breyting að fleiri fyrirtæki munu sækjast eftir því að fá skráningu á hlutabréfamarkað. Gjaldeyrishöft munu áfram styðja við gengi verðtryggðra ríkisskuldabréfa ekki síst vegna þess að vænt framboð á árinu 2012 er minna en áætluð eftirspurn.
|
(Smelltu á mynd til að stækka)
Nánari upplýsingar um ávöxtunarleiðir er að finna á mánaðarlegum upplýsingablöðum. Hægt er að fylgjast með daglegri gengisþróun safnanna á síðunni yfirlit ávöxtunarleiða.
<<Til baka
