4. kafli. Samtryggingarsjóður

16. grein. Um samtryggingarsjóðinn

16.1 Samtryggingarsjóður Almenna lífeyrissjóðsins hefur það markmið að taka við lágmarks­iðgjöld­um sjóðfélaga og tryggja þeim lágmarkstryggingavernd skv. lögum nr. 129/1997 um skyldu­trygg­ingu lífeyris­réttinda og starfsemi lífeyrissjóða. Auk þess geta einstakir sjóðfélagar greitt í sam­tryggingarsjóðinn og áunnið sér viðbótartrygginga­vernd vegna ellilífeyris til æviloka, örorku­­lífeyris og maka- og barnalífeyris við fráfall sjóð­félaga.

16.2 Samtryggingarsjóði er heimilt að tryggja áhættudreifingu vegna lífeyrisskuld­bindinga sinna, að hluta til eða öllu leyti, hjá vátryggingafélögum, sbr. lög um vá­trygginga­starfsemi. Einnig er sam­trygg­ingarsjóðnum heimilt að kaupa tiltekna trygg­inga­vernd hjá vátrygg­ingafélögum eða öðrum líf­eyris­sjóðum fyrir einstaka sjóðfélaga sína. Enn­ fremur er Almenna lífeyrissjóðnum heimilt að hafa sam­starf við aðra lífeyrissjóði um einstaka þætti trygg­inga­verndar.

16.3 Samtryggingarsjóður Almenna lífeyrissjóðsins er sjálfstæður rekstraraðili og er rekstur hans fjárhagslega aðskilinn rekstri séreignarsjóðs.

16.4 Iðgjöld samtryggingarsjóðs skulu ávöxtuð í sérstöku verðbréfasafni fyrir samtryggingarsjóðinn. Stjórn Almenna lífeyrissjóðsins skal móta fjárfestingarstefnu og ávaxta fé samtryggingar­sjóðsins með hliðsjón af þeim kjör­um sem best eru boðin á hverjum tíma með tilliti til ávöxt­unar og áhættu. Stjórnin skal ávaxta fé sjóðsins með tilliti til heimilda í VII. kafla laga um skyldu­tryggingu lífeyris­rétt­inda og starfsemi lífeyrissjóða nr. 129/1997 með síðari breyt­ingum.

17. grein. Réttindi í samtryggingarsjóði

17.1 Með greiðslum í samtryggingarsjóð geta sjóðfélagar tryggt sér lágmarks­trygg­ingavernd sam­kvæmt lögum nr. 129/1997 um skyldutryggingu lífeyrisréttinda og starfsemi lífeyrissjóða. Á þann hátt tryggja sjóð­félagar sér lífeyris­greiðslur frá 70 ára aldri til æviloka, ör­orkulífeyri við starfs­orkumissi og maka- og barnalífeyri við fráfall sjóð­félaga.

17.2 Með greiðslu iðgjalds til lágmarkstryggingaverndar ávinnur sjóðfélagi sér rétt til ellilífeyris, örorkulífeyris og maka- og barnalífeyris. Lágmarkstryggingaverndin er skilgreind í greinum 19 til 21.

17.3 Viðbótartryggingavernd. Sjóðfélagar geta greitt viðbótariðgjald í samtryggingarsjóðinn og bætt við sig lágmarksréttindum og viðbótarellilífeyri. Viðbótartryggingaverndin er skilgreind í grein 22.

18. grein. Ellilífeyrir

18.1. Mánaðarlegur ellilífeyrir er greiddur frá 70 ára aldri til æviloka. Sjóðfélagi getur flýtt töku lífeyris og hafið lífeyrisgreiðslur 60 ára en þá lækkar fjárhæð mánaðarlegs ellilífeyris samanber töflu 2 í 6. kafla.

18.2. Réttindi sjóðfélaga til ellilífeyris eru reiknuð í krónum og ráðast réttindi af því ið­gjaldi sem greitt er í samtryggingarsjóðinn hverju sinni. Réttindin ráðast af aldri sjóðfélaga í lok þess mánaðar sem iðgjald er greitt fyrir til samtryggingarsjóðsins sbr. töflu nr. 1 í 6. kafla samþykktanna. Réttindin eru verð­tryggð og breytast í samræmi við breytingu vísitölu neysluverðs til verðtryggingar.

18.3 Ellilífeyrir er greiddur mánaðarlega fyrirfram til dauðadags samkvæmt uppsöfnuð­um réttindum. Réttur til ellilífeyris fell­ur niður við andlát. Réttur til töku ellilífeyris er fyrst vegna fyrsta mánaðar eftir að 60 ára aldri er náð og skal síðast hefja greiðslur vegna fyrsta mánaðar eftir að 70 ára aldri er náð. Sjá töflu nr. 2 í 6. kafla samþykktanna.

19. grein. Örorkulífeyrir

19.1 Sjóðfélagi á rétt á örorkulífeyri ef hann verður fyrir varanlegu orkutapi sem metið er 50% eða meira og hefur orðið vanhæfur til að gegna starfi sínu og orðið fyrir sannanlegri tekju­skerðingu af völdum orkutapsins. Örorkulífeyrir er miðaður við áunnin lífeyrisréttindi sbr. gr. 19.3. og framreiknuð rétt­indi ef sjóðfélagi uppfyllir eftirfarandi skilyrði.

1. Sjóðfélagi hefur greitt til samtryggingarsjóðs Almenna lífeyrissjóðsins í a.m.k. þrjú ár á undanfarandi fjórum árum og greitt eigi minna en 41.390 kr. hvert ár. Fjárhæðin er verðtryggð og miðar við vísitölu neysluverðs í janúar 2005, gildi 239,0.

2. Sjóðfélagi hefur greitt til samtryggingarsjóðs Almenna lífeyrissjóðsins í a.m.k. sex mánuði á síðasta tólf mánaða tímabili.

3. Sjóðfélagi hefur ekki orðið fyrir orkutapi sem rekja má til ofnotkunar áfengis, lyfja eða fíkniefna.

19.2 Hafi sjóðfélagi öðlast rétt til framreiknings sem fellur niður vegna tíma­bund­innar fjarveru af vinnu­markaði, vegna vinnu erlendis, náms, leyfis frá störfum, barn­eigna eða sam­bærilegra ástæðna skal framreikningsréttur stofnast á nýjan leik eigi síðar en sex mánuðum frá því hann hefur aftur störf og greiðslu iðgjalds til samtryggingarsjóðs Almenna lífeyrissjóðsins.

19.3 Réttindi sjóðfélaga til örorkulífeyris eru reiknuð í krónum og ráðast réttindi af því ið­gjaldi sem greitt er í samtryggingarsjóðinn ár hvert. Réttindin ráðast af aldri sjóðfélaga þegar iðgjald er greitt til samtryggingarsjóðsins sbr. töflu nr. 1 í 6. kafla samþykktanna. Réttindin eru verð­tryggð og breytast í samræmi við breytingu vísitölu neysluverðs.

Ef sjóðfélagi á rétt á fram­reiknuðum réttindum skal til viðbótar við áunnin réttindi reikna hvaða lífeyris­réttindi hann hefði áunnið sér með greiðslum til 65 ára aldurs sbr. töflu 1 í 6. kafla. Við framreikning rétt­inda skal reikna með meðalinnborgun næstu þriggja almanaksára áður en orku­tapið átti sér stað.

Full­ur örorkulífeyrir er greiddur m.v. 100% örorku en lífeyris­greiðslur eru hlutfallslegar ef orku­tap­ið er á bilinu 50% til 100%.

19.4 Örorkulífeyrir greiðist ekki fyrstu þrjá mánuði eftir orkutap. Ekki er greiddur örorkulífeyrir ef orkutap hefur varað skemur en í sex mánuði. Verði sjóðfélagi öryrki eftir 67 ára aldur er ekki greiddur örorkulífeyrir.

19.5 Örorkulífeyrir er greiddur ef trúnaðarlæknir sjóðsins eða tryggingayfirlæknir metur læknis­fræðilega örorku að minnsta kosti 50% (örorkuprósenta) og sjóðfélagi hafi orðið fyrir skerðingu launatekna sbr. grein 19.6.

19.6 Örorkumatið skal miða við hæfi sjóðfélaga til þess að afla sér launatekna. Hundraðs­hluta örorku skal ákvarða að fengnum upplýsingum um heilsufarssögu umsækjanda og upplýsing­um um störf og launatekjur umsækjanda á síðustu þremur árum og möguleika hans á öflun launatekna á matsdegi. Telji stjórn sjóðsins þrjú síðustu ár vera sjóð­fél­aganum óhagstæð vegna t.d. sjúkdómsforfalla eða atvinnu­leysis, er henni heimilt að leggja til grundvallar þrjú bestu árin af síðustu fimm árum.

19.7 Örorkuna skal meta eigi sjaldnar en á þriggja ára fresti eða oftar ef óskir þess efnis liggja fyrir af hálfu sjóðstjórnar eða af hálfu örorkulífeyrisþegans. Stjórn skal lækka eða fella niður örorku­líf­eyri þeirra öryrkja sem fá starfsorku sína aftur að nokkru eða öllu leyti. Sömuleiðis ber henni að hækka örorkulífeyrinn, ef ör­orkan vex til muna frá því sem hún var metin við fyrri ákvarðanir án eigin sakar sjóðfélaga.

Örorkumat samkvæmt 19.5 og 19.6 skal fyrstu þrjú árin miða við vanhæfni sjóðfélagans til þess að gegna því starfi sem hann hefur gegnt. Að því tímabili loknu skal miða örorkumatið við vanhæfni sjóðfélagans til almennra starfa.

19.8 Örorkulífeyri skal margfalda með örorkuprósentunni. Aldrei skal örorkulífeyrir vera hærri en sem nemur þeim tekjumissi sem sjóðfélaginn hefur sannanlega orðið fyrir vegna örorkunnar. Því til sönnunar getur stjórn sjóðsins krafist vottorða frá skattstofu, vinnuveitanda o.s.frv.

Við mat á því hvort tekjuskerðing hafi orðið skal úrskurða sjóðfélaganum viðmiðunartekjur, sem skulu vera meðaltal tekna sjóðfélaga síðustu þrjú almanaksár fyrir orkutapið, sbr. gr. 19.3 um framreikning. Frá úrskurðardegi skulu viðmiðunartekjurnar taka þeim breytingum sem verða á launavísitölu. Við útreikning tekjumissis skal tekið tillit til atvinnutekna örorku­líf­eyrisþegans, lífeyris- og bótagreiðslna frá almannatryggingum og öðrum lífeyrissjóðum og kjarasamningsbundinna tryggingabóta sem hann nýtur vegna örorkunnar. Í úrskurði um lífeyri skal greina hvaða launatekjur eru lagðar til grundvallar útreikningi, svo sjóðfélaga megi vera ljóst við hvaða mörk lækkun örorkulífeyris vegna tekna er miðað. Örorkulífeyrisþega er skylt að veita sjóðnum upplýsingar um tekjur sínar skv. launaframtali, sé þess óskað. Heimilt er að fresta eða fella niður greiðslur lífeyris, veiti sjóðfélagi ekki umbeðnar upplýsingar.

19.9 Heimilt er að fengnu áliti trúnaðarlæknis, að setja það skilyrði fyrir greiðslu örorku­lífeyris, að sjóðfélagi fari í endurhæfingu, sem gæti leitt til betra heilsufars og hæfni til þess að afla sér launatekna í framtíðinni.

19.10 Skylt er sjóðfélaga sem sækir um örorkulífeyri úr samtryggingarsjóði eða nýtur hans að láta stjórn sjóðsins í té allar upplýsingar um heilsufar sitt sem nauðsynlegar eru til þess að dæma um rétt hans til örorkulífeyris.

19.11 Ákveðnum hluta örorkulífeyrisgreiðslna skal varið til innborgana í séreignarsjóð eða til kaupa á viðbótarellilífeyrisréttindum í samtryggingarsjóði kjósi sjóðfélaginn svo.

19.12 Örorkulífeyrir fellur niður þegar örorkan er metin minna en 50% eða þegar sjóðfélagi hættir að verða fyrir tekjumissi, sbr. gr. 19.5 og gr. 19.8, eða við ellilífeyrisaldur sjóðfélagans. Við ellilífeyrisaldur skal endurmeta áunnin lífeyrisréttindi sjóðfélagans þannig að við áunnin lífeyrisréttindi við áður úrskurðuð örorkulífeyrisréttindi bætast framreiknuð réttindi reiknuð hlutfallslega miðað við örorkumat, sbr. gr. 19.5, að teknu tilliti til tekna, sbr. gr. 19.8.

20. grein. Maka- og barnalífeyrir

20.1 Við andlát sjóðfélaga er greiddur makalífeyrir til eftirlifandi maka.

20.2 Fullur makalífeyrir er greiddur til maka látins sjóðfélaga í minnst tvö ár og síðan helm­ingur makalífeyris í eitt ár þar á eftir. Fullur makalífeyrir er greiddur lengur ef einu af eftirfarandi skilyrðum er fullnægt:

1. Yngsta barn sem maki hefur á framfæri sínu, sem sjóðfélagi hafði áður á framfæri sínu, er yngra en 20 ára.

2. Makinn er a.m.k. 50% öryrki og yngri en 67 ára.

20.3 Fullur makalífeyrir er 50% af áunnum og framreiknuðum örorkulífeyri sjóðfélaga við andlátið m.v. 100% örorku.

20.4 Andist sjóðfélagi sem greitt hefur iðgjöld til samtryggingarsjóðs í a.m.k. 24 mánuði á undan­farandi 36 mánuðum eða notið elli- og örorkulífeyris við andlátið eða öðlast rétt til fram­reikn­ings samkvæmt grein 19.1. skulu börn hans skv. grein 2.3. sem yngri eru en 20 ára eiga rétt á lífeyri til 20 ára aldurs. Sama rétt til lífeyris öðlast börn örorkulífeyrisþega sem öðlast hefur rétt til framreiknings samkvæmt grein 19.1. ef börnin eru fædd eða ættleidd fyrir orkutap og allt að 12 mánuðum eftir orkutapið. Ef örorka er metin lægri en 100% skal barnalífeyrir vera hlutfalls­lega lægri.

Veiti fráfall eða örorka sjóðfélagans börnunum jafnframt rétt til lífeyris úr öðrum lífeyrissjóði skal lífeyrir úr þessum sjóði þá bundinn því skilyrði að sjóðfélaginn hafi síðast greitt iðgjöld til þessa sjóðs.

20.5 Fullur barnalífeyrir skal vera að lágmarki 18.464 kr. á mánuði með hverju barni örorku­lífeyris­þega eða hverju barni látins sjóðfélaga. Eigi barn látins sjóðfélaga hvorki foreldri né kjörforeldri á lífi verður greiddur tvöfaldur barnalífeyrir með hverju barni. Fjár­hæð­ir þessar skulu breytast árlega í hlutfalli við breytingu á vísitölu neysluverðs miðað við grunn­­vísitölu 239,0 stig í janúar 2005.

21. grein. Viðbótartryggingavernd

21.1 Sjóðfélagar geta hækkað iðgjald til samtryggingarsjóðs Almenna lífeyrissjóðsins og bætt við sig eftirfarandi lífeyrisréttindum.

1. Viðbót við lágmarkstryggingavernd.

2. Viðbótarellilífeyri.

Óski sjóðfélagi eftir að greiða viðbótariðgjald til samtryggingarsjóðsins skal gerður skriflegur samn­ingur við sjóðfélagann um hversu hátt hlutfall af iðgjaldsstofni viðbótariðgjaldið skuli vera, gildistíma og ráðstöfun þess sbr. gr. 21.2 og 21.3. Hámarksiðgjald í samtryggingarsjóðinn er 15%. Stjórn sjóðsins er þó heimilt að hafna eða takmarka viðtöku iðgjalds umfram 10% af iðgjaldsstofni ef telja verður að skuldbindingar sjóðsins vegna sjóðfélagans myndu aukast veru­lega umfram verðmæti iðgjalda enda skal slík ákvörðun vera rökstudd með skriflegu áliti trygg­inga­fræðings sjóðsins.

21.2 Sjóðfélagar geta óskað eftir því að viðbótariðgjaldi verði varið til að bæta við sig lágmarks­tryggingavernd sbr. greinar 18 til 20. Ef réttur til framreiknings, sbr. gr. 19.3 og 20.4, myndast við úrskurð lífeyris skal þó takmarka iðgjaldið sem lagt er til grundvallar framreikningnum við hlutfallslega (af iðgjaldsstofni) lægsta iðgjald sem greitt hefur verið til sjóðsins síðustu 3 almanaks­árin fyrir úrskurð lífeyris. Þó skal aldrei miða hlutfallslega við lægra iðgjald en tilgreint er hverju sinni í grein 4.1.

21.3 Sjóðfélagar geta notað inneign í séreignarsjóði eða hluta hennar til að bæta við sig ellilífeyrisréttindum til æviloka og reiknast réttindi þá samkvæmt töflu 3.

22. grein. Um skiptingu réttinda á milli sjóðfélaga og maka

22.1 Sjóðfélagi getur ákveðið að skipta lífeyrisréttindum á milli sín og maka síns í samræmi við 14. grein laga nr. 129/1997 um skyldutryggingu lífeyrisréttinda og starfsemi lífeyrissjóða.

1. Áður en taka lífeyris hefst en þó eigi síðar en fyrir 65 ára aldur og ef sjúkdómar eða heilsufar draga ekki úr lífslíkum, að verðmæti uppsafnaðra ellilífeyris­rétt­inda hans skuli allt að hálfu renna til að mynda sjálfstæð ellilífeyrisréttindi fyrir maka hans eða fyrrver­andi maka og skerðast þá réttindi sjóð­félag­ans sem því nemur. Heildar­­skuldbinding lífeyrissjóðsins skal ekki aukast við þessa ákvörðun sjóð­félagans og skal farið eftir töflum frá Félagi íslenskra tryggingastærðfræðinga við skiptingu réttinda og tekið tillit til aldurs maka.

2. Að iðgjald vegna hans sem gengur til að mynda ellilífeyrisréttindi skuli allt að hálfu renna til þess að mynda sjálfstæð réttindi fyrir maka hans. Við ráð­stöfun ið­gjalds til lágmarks­trygg­inga­vernd­ar og viðbótartrygginga­verndar skal litið svo á að ið­gjalds­stofni sjóð­félagans hafi ver­ið skipt milli hans og makans eins og iðgjaldinu.

23. grein. Tilhögun lífeyrisgreiðslna úr samtryggingarsjóði

23.1 Umsókn um lífeyri skal vera skrifleg. Lífeyrir greiðist að jafnaði mánaðarlega. Lífeyrir greiðist lífeyrisþeganum eða þeim, sem hann veitir til þess skriflegt umboð.

23.2 Lífeyrir skal fyrst greiddur fyrir næsta mánuð eftir að réttur til hans stofnast, og síðast fyrir þann mánuð, sem réttur til hans fellur úr gildi. Ellilífeyrir er greiddur eftir að umsókn berst til sjóðsins og greið­ist ekki aftur í tímann. Hafi ekki borist umsókn um ellilífeyri við 70 ára aldur sjóðfélaga skal hefja greiðslur ellilífeyris án umsóknar. Við fráfall ellilífeyrisþega hefjast makalífeyrisgreiðslur í næsta mánuði eftir að ellilífeyrisgreiðslum lýkur.

23.3 Sjóðfélagi getur ákveðið að ellilífeyrisgreiðslur hans, allt að hálfu, renni til maka hans eða fyrrverandi maka og skal þá skipta greiðslum í samræmi við ákvörðun sjóðfélagans, en þær falla niður við andlát hans. Deyi makinn eða fyrrverandi maki sem nýtur slíkra greiðslna hins vegar á undan sjóð­félaganum, skulu greiðslurnar allar renna til sjóðfélagans.

23.4 Stjórn er ekki skylt að greiða örorkulífeyri lengra aftur í tímann en tvö ár, reiknað frá byrjun þess mánaðar, er umsókn barst sjóðnum.

23.5 Ef lífeyrisréttindi ná ekki 5.000 krónum á mánuði er stjórn sjóðsins heimilt að greiða réttindin sem eingreiðslu í samræmi við tillögur tryggingafræðings. Upphæðin breytist árlega í hlutfalli við breytingu á vísitölu neysluverðs miðað við grunn­vísitölu 239,0 stig í janúar 2005. Við eingreiðslu lífeyrisréttinda falla makalífeyrisréttindi niður.

23.6 Lífeyrisgreiðslur samkvæmt greinum 18.–21. og grein 25 eru verðtryggðar og breytast til samræmis við breytingu á vístitölu neysluverðs til verðtryggingar.

24. grein. Tryggingafræðileg athugun

24.1 Árlega skal stjórn samtryggingarsjóðs fá óháðan tryggingafræðing til þess að reikna fjár­hag samtryggingarsjóðsins og semja skýrslu um athugunina í samræmi við ákvæði 39. og 24. gr. laga nr. 129/1997. Sýni uppgjörið hagnað skal honum varið til hækkunar á lífeyrisréttindum sjóðfélaganna eftir tillögum tryggingafræðingsins og sam­kvæmt heimildum í 39. grein laga um skyldutryggingu lífeyrisréttinda og starfsemi lífeyris­sjóða nr. 129/1997. Sýni upp­gjörið halla ber að lækka lífeyrisréttindin. Sýni tryggingafræðilegt uppgjör að iðgjald til lágmarkstryggingaverndar sem tilgreint er í grein 4.1 nægi ekki til að veita lágmarkstryggingavernd skv. lögum um skyldutryggingu lífeyrisréttinda og starfsemi lífeyrissjóða nr. 129/1997 skal stjórn leggja tillögu um breytingu á lágmarksiðgjaldi og réttindatöflum fyrir ársfund eftir tillögu tryggingafræðings.

25. grein. Flutt réttindi

25.1 Sjóðfélagar sem áttu réttindi í Lífeyrissjóði arkitekta 30. júní 1998 eiga flutt réttindi í sam­trygg­ingar­sjóði:

Ellilífeyrisréttindi frá 65 ára aldri sem svara til áunninna ellilífeyrisréttinda frá 65 ára aldri í Lífeyris­sjóði arkitekta.

Örorkulífeyrisréttindi til 65 ára aldurs sem svara til áunninna örorkuréttinda í Lífeyrissjóði arkitekta.

Fjölskyldulífeyrisréttindi við fráfall sjóðfélaga fyrir 65 ára aldur sem tryggja eftirlifandi maka eingreiðslu sem jafngildir því að fá áunnin eftirlaunaréttindi m.v. 65 ára aldur greidd í tvö ár.

25.2 Sjóðfélagar sem áttu örorkuréttindi í Lífeyrissjóði Tæknifræðingafélags Íslands 30. júní 1998 og greiddu fyrir þau af séreign sinni við stofnun Lífeyrissjóðs arkitekta og tækni­fræðinga fluttu sambæri­leg örorkuréttindi til 65 ára aldurs í tryggingadeild Lífeyris­sjóðs arkitekta og tækni­fræð­inga og eiga flutt örorkuréttindi. Flutt örorkuréttindi úr Lífeyrissjóði Tæknifræðinga­félags Íslands féllu niður 30.6.2003 nema sjóðfélagar hafi valið að breyta þeim í geymd örorkuréttindi til 65 ára aldurs.

25.3 Flutt réttindi skv. greinum 25.1 og 25.2 eru verðtryggð og breytast með vísitölu neysluverðs, grunnvísitala í júlí 1998 gildi 184,0. Sömu skilyrði og koma fram í greinum 18 til 21 gilda um flutt réttindi.

25.4 Sjóðfélagar sem áttu réttindi í Lífeyrissjóði lækna 31. desember 2005 eiga flutt réttindi í sam­trygg­ingar­sjóði:

Ellilífeyrisréttindi frá 67 ára aldri sem svara til áunninna ellilífeyrisréttinda frá 67 ára aldri í Lífeyris­sjóði lækna.

Örorkulífeyrisréttindi til 67 ára aldurs sem svara til áunninna örorkuréttinda í Lífeyrissjóði lækna.

Makalífeyrisréttindi við fráfall sjóðfélaga sem tryggja eftirlifandi maka ævilangan lífeyri sem nemur 60% af áunnum elli- og örorkulífeyrisréttindum í Lífeyrissjóði lækna. Réttur til makalífeyris fellur niður ef makinn gengur í hjónaband á ný, stofnar til sambúðar sem jafna má til hjúskapar eða stofnar til staðfestrar samvistar.

25.5 Sjóðfélagar í Lífeyrissjóði lækna geta óskað eftir því fyrir 25. janúar 2006 að allt að 20% af eftir­launaréttindum verði varið til

1. að tryggja maka fjölskyldulífeyri (eingreiðslu) ef sjóðfélagi fellur frá fyrir 67 ára aldur. Fjárhæð fjölskyldulífeyris er reiknuð af tryggingafræðingi og lækkar með aldrinum samkvæmt reglum sem lýst er hér á eftir. Lífeyrissjóðurinn skal árlega senda sjóðfélögum sem velja að tryggja maka fjölskyldu­lífeyri upplýsingar um fjárhæð fjölskyldu­lífeyris á því ári.

Við fráfall sjóðfélaga getur maki valið um þrjár leiðir um útborgun fjölskyldulífeyris:

a) Maki getur fengið fjölskyldulífeyrinn greiddan út sem eingreiðslu.

b) Maki getur lagt fjölskyldulífeyrinn í séreignarsjóð og tekið síðan út inneignina samkvæmt þeim reglum sem þar gilda.

c) Maki getur greitt fjölskyldulífeyrinn í samtryggingarsjóð og tryggt sér þannig lífeyrisgreiðslur til æviloka samkvæmt töflu 3 í 6. kafla.

Fjárhæð fjölskyldulífeyris er reiknuð af tryggingafræðingi samkvæmt eftirfarandi reglum:

· Hámarksfjárhæð í upphafi er 30 föld iðgjöld til samtryggingar sem greidd voru til sjóðsins árið 2005 fyrir sjóðfélaga sem eru 40 ára og yngri. Margfeldið lækkar um 2 fyrir hvert ár umfram 40 til og með 45 ára aldurs og síðan um 1 eftir það.

· Fjárhæð fjölskyldulífeyris í upphafi getur þó ekki orðið hærri en svo að verðmæti fjölskyldulífeyris sé 20% af verðmæti áunnins ellilífeyrisréttar í lok árs 2005 samkvæmt útreikningi tryggingafræðings.

· Tryggingartími er til 50 ára aldurs að viðbættum fjórðungi aldurs sjóðfélaga í upphafi tryggingar þó að hámarki til 67 ára aldurs.

· Fjölskyldulífeyrir lækkar síðan í upphafi hvers almanaksárs um sama hlutfall og tími til loka fjölskyldulífeyris styttist á undangengnu ári.

2. að mynda inneign fyrir sjóðfélaga í séreignarsjóði.

25.6 Við breytingu á samþykktum 1. janúar 2006 var felld niður heimild fyrir sjóðfélaga til að afla hluta af lágmarkstryggingavernd í séreignarsjóði samkvæmt sér­eignar­leið. Samkvæmt henni var miðað við að sér­eignar­­sjóður greiddi sambærilegar lífeyrisgreiðslur á aldrinum 70-79 ára og áunnin lágmarks­elli­lífeyris­réttindi í samtryggingarsjóði frá 80 ára aldri. Við þessa breytingu voru ellilífeyrisréttindi frá 80 ára aldri, hjá sjóðfélögum sem höfðu valið séreignarleiðina, umreiknuð yfir í eftirlaunasjóð og flutt í eftirlaunadeild.