2. kafli. Stjórn, ársfundur og fjárfestingarheimildir
5. grein. Stjórn
5.1 Stjórn sjóðsins skal skipuð sex sjóðfélögum kjörnum á ársfundi til þriggja ára í senn.
Varamenn í stjórn eru þrír sjóðfélagar kosnir af sjóðfélögum.
Að jafnaði skulu ár hvert kosnir tveir sjóðfélagar á ársfundi og einn til vara.
Framboðum til stjórnar (aðalmenn) skal skila viku fyrir ársfund til stjórnar sjóðsins. Stjórnarmenn skulu kosnir með meirihlutakosningu. Ef kjósa á einn frambjóðanda fer öll inneign sjóðfélaga á þann frambjóðanda. Ef kjósa skal tvo stjórnarmenn getur sjóðfélagi merkt við tvo frambjóðendur og fá þeir þá báðir alla inneign sjóðfélagans.Varamenn skulu kosnir í sérstakri kosningu þegar kjör aðalstjórnarmanna hefur farið fram.
Varamenn skulu boðaðir í fjarveru stjórnarmanna í þeirri röð sem þeir voru kosnir. Varamenn hafa eingöngu atkvæðisrétt þegar þeir sitja sem aðalmenn.
Stjórnarmaður má sitja í stjórn sjóðsins í allt að 12 ár.
5.2 Stjórnarmenn skulu vera búsettir hér á landi, lögráða og fjár síns ráðandi og uppfylla að öðru leyti skilyrði 31. gr. laga um skyldutryggingu lífeyrisréttinda og starfsemi lífeyrissjóða nr. 129/1997.
Stjórn Almenna lífeyrissjóðsins ber ábyrgð á starfsemi sjóðsins í samræmi við lög nr. 129/1997, reglugerðir settar samkvæmt þeim og samþykktir sjóðsins. Stjórnin setur sér starfsreglur og gerir tillögur til breytinga á samþykktum sjóðsins á ársfundi.
Stjórn sjóðsins fer með yfirstjórn hans og fjallar um allar meiriháttar ákvarðanir varðandi stefnumótun sjóðsins og starfsemi. Hún ræður framkvæmdastjóra, ákveður laun hans og önnur starfskjör og setur honum starfsreglur. Stjórnin ræður forstöðumann endurskoðunardeildar eða semur við sjálfstætt starfandi eftirlitsaðila um að annast innra eftirlit. Semji stjórn við sjálfstætt starfandi eftirlitsaðila má ekki semja við endurskoðunarfélag sem endurskoðar ársreikning sjóðsins.
Stjórn sjóðsins skal móta fjárfestingarstefnu hans, setja reglur um upplýsingagjöf framkvæmdastjóra til stjórnar um rekstur, iðgjöld, réttindaávinnslu og ráðstöfun eigna sjóðsins. Þá skal stjórnin setja verklagsreglur um verðbréfaviðskipti lífeyrissjóðsins, stjórnar hans og starfsmanna og fá þær staðfestar af Fjármálaeftirlitinu. Stjórnin veitir og afturkallar prókúruumboð til handa framkvæmdastjóra og öðrum starfsmönnum.
5.3 Stjórn sjóðsins skal kjósa sér formann og skipta með sér verkum að öðru leyti. Formaður kveður til stjórnarfundar og skal fund halda ef einhver stjórnarmanna krefst þess. Um það, sem gerist á stjórnarfundum, skal haldin gerðabók sem undirrituð skal af þeim er fundinn sitja.
5.4 Stjórn sjóðsins er ákvörðunarbær þegar meirihluti stjórnarmanna sækir fund. Mikilvæga ákvörðun má þó ekki taka nema allir stjórnarmenn hafi haft tök á því að fjalla um málið sé þess kostur. Einfaldur meirihluti atkvæða ræður úrslitum á stjórnarfundum.
5.5 Stjórn sjóðsins kemur fram fyrir hönd sjóðsins og skuldbindur hann. Stjórnin getur veitt stjórnarmönnum eða öðrum heimild til þess að skuldbinda sjóðinn, sbr. 29. grein.
5.6 Stjórn Almenna lífeyrissjóðsins hefur heimild til að bjóða fulltrúum hópa sjóðfélaga að sitja stjórnarfundi sem áheyrnarfulltrúar með málfrelsi og tillögurétt.
5.7 Stjórn Almenna lífeyrissjóðsins er launuð og ákveður ársfundur stjórnarlaun fyrir liðið starfsár.
5.8 Bráðabirgðaákvæði sem gildir til ársfundar árið 2011.
Við sameiningu Lífeyrissjóðs lækna og Almenna lífeyrissjóðsins þann 1. janúar 2006 skal stjórn Almenna lífeyrissjóðsins skipuð níu aðalmönnum og fjórum varamönnum úr stjórnum hinna sameinuðu lífeyrissjóða.
Úr stjórn Lífeyrissjóðs lækna koma tveir stjórnarmenn tilnefndir af Læknafélagi Íslands á ársfundi 2003 og einn kosinn á ársfundi 2003. Úr varastjórn kemur einn varamaður tilnefndur af Læknafélagi Íslands á ársfundi 2003 skv. ákvörðun stjórnar Læknafélags Íslands. Stjórn Lífeyrissjóðs lækna var tilnefnd/kosin til þriggja ára og sitja stjórnarmenn úr Lífeyrissjóði lækna í stjórn sameinaðs sjóðs til ársfundar 2006.Úr stjórn Almenna lífeyrissjóðsins koma tveir stjórnarmenn sem kosnir voru á ársfundi 2004 og tveir kosnir á ársfundi 2005. Auk þess kemur einn stjórnarmaður sem tilnefndur var af Íslandsbanka 2004 og annar tilnefndur 2005. Úr varastjórn kemur einn stjórnarmaður kosinn á ársfundi 2004 og annar kosinn 2005, auk eins sem tilnefndur er af Íslandsbanka 2005. Stjórn Almenna lífeyrissjóðsins var tilnefnd/kosin til tveggja ára og sitja stjórnarmenn úr Almenna lífeyrissjóðnum í stjórn sameinaðs sjóðs til ársfunda 2006 og 2007 eftir því hvenær þeir voru kosnir/tilnefndir.
Á ársfundi sjóðsins 2006 skal kjósa tvo aðalmenn og einn varamann í stjórn til tveggja ára og einn aðalmann í stjórn til þriggja ára. Jafnframt tilnefnir þá stjórn Íslandsbanka einn aðalmann í stjórn til þriggja ára og Læknafélag Íslands tilnefnir einn aðalmann í stjórn til tveggja ára og einn aðalmann og einn varamann í stjórn til þriggja ára.
Á ársfundi sjóðsins 2007 skal kjósa tvo aðalmenn og einn varamann í stjórn til þriggja ára og jafnframt tilnefnir stjórn Íslandsbanka einn aðalmann og einn varamann í stjórn til þriggja ára.
Á ársfundi sjóðsins 2008 skal kjósa þrjá aðalmenn og einn varamann í stjórn til þriggja ára.Á ársfundi sjóðsins 2009 skal kjósa tvo aðalmenn og einn varamann í stjórn til þriggja ára. Á fundinum skal einnig kjósa einn stjórnarmann og einn varamann til eins árs í staðinn fyrir fulltrúa Íslandsbanka sem voru tilnefndir á ársfundi 2007 en hætta á ársfundi 2009.Eftir það gildir ákvæði gr. 5.1.
Tafla yfir kjör og tilnefningu aðalstjórnar og varastjórnar samkvæmt bráðabirgðaákvæði þessu fylgir samþykktum þessum sem fylgiskjal I.
5.9 Bráðabirgðaákvæði sem gildir til ársfundar árið 2015.Ákvæði um hámarksstjórnarsetu í grein 5.1. gildir frá 1. janúar 2003
6. grein. Ársreikningur og endurskoðun
6.1 Reikningsár sjóðsins er almanaksárið.
6.2 Ársfundur kýs endurskoðanda eða endurskoðunarfélag til að endurskoða ársreikning lífeyrissjóðsins. Eftirlit með starfsemi sjóðsins fer eftir ákvæðum IX. kafla laga nr. 129/1997.
6.3 Stjórnin semur ársreikning fyrir lok marsmánaðar næsta árs eftir reikningsárið. Skal ársreikningur liggja frammi á skrifstofu sjóðsins til athugunar fyrir sjóðfélaga. Ársreikningur skal einnig sendur Fjármálaeftirlitinu.
6.4 Ársreikningur skal gerður samkvæmt lögum og góðri reikningsskilavenju, svo og samkvæmt reglum er kunna að verða settar um ársreikning lífeyrissjóða. Endurskoðendur skulu staðfesta með áritun á ársreikninginn að reikningurinn og bókhald sjóðsins, sem hann er byggður á sé fært eftir viðurkenndum bókhaldsreglum, svo og að öll ráðstöfun á fé sjóðsins sé í samræmi við ákvæði þessara samþykkta.
6.5 Stjórn sjóðsins skal á fyrsta fundi sínum eftir ársfund skipa þriggja manna endurskoðunarnefnd til eins árs í samræmi við 108. gr. a laga nr. 3/2006 um ársreikninga. Endurskoðunarnefndin leitast við að tryggja áreiðanleika ársreikninga og annarra fjármálaupplýsinga ásamt óhæði endurskoðenda sjóðsins. Hlutverk nefndarinnar er eftirfarandi:
1. Eftirlit með vinnuferli við gerð reikningsskila.
2. Eftirlit með fyrirkomulagi og virkni innra eftirlits einingarinnar, innri endurskoðun, ef við á, og áhættustýringu.
3. Eftirlit með endurskoðun ársreiknings og samstæðureiknings einingarinnar.
4. Mat á óhæði endurskoðanda eða endurskoðunarfyrirtækis og eftirlit með öðrum störfum endurskoðanda eða endurskoðunarfyrirtækis.
5. Setja fram tillögu til stjórnar um val á endurskoðanda eða endurskoðunarfyrirtæki.
7. grein. Ársfundur og aðrir sjóðfélagafundir
7.1 Skylt er stjórn sjóðsins að boða til ársfundar sjóðfélaga einu sinni á ári í mars eða apríl.
7.2 Stjórnin skal boða ársfundinn með minnst 14 daga fyrirvara með bréfi eða á annan sannanlegan hátt. Í fundarboði skal geta dagskrár. Ársfundur er löglegur sé löglega til hans boðað.
7.3 Á ársfundi skal stjórn Almenna lífeyrissjóðsins gefa skýrslu um störf sín á liðnu starfsári og um hag sjóðsins. Þá skulu á ársfundi kjörnir þeir trúnaðarmenn sjóðsins, sem gert er ráð fyrir í samþykktum þessum.
Dagskrá ársfundar skal vera sem hér segir.
- Skýrsla stjórnar.
- Staðfesting ársreiknings liðins starfsárs og kynning á tryggingafræðilegu uppgjöri samtryggingarsjóðs.
- Kynning á fjárfestingarstefnu .
- Tillögur um breytingar á samþykktum sjóðsins, ef þær liggja fyrir sbr. 8. gr.
- Kosning stjórnar.
- Kosning endurskoðenda eða endurskoðunarfélags.
- Ákvörðun um laun stjórnar.
- Önnur mál.
7.4 Aðra sjóðfélagafundi skal halda þegar stjórn telur ástæðu til eða 3% sjóðfélaga krefjast þess. Slíka sjóðfélagafundi skal boða á sama hátt og ársfund.
7.5 Sjóðfélagafundur er lögmætur, sé löglega til hans boðað.
7.6 Sjóðfélagafundur hefur heimild til að breyta samþykktum sjóðsins.
8. grein. Breyting á samþykktum og atkvæðisréttur á sjóðfélagafundum
8.1 Tillögur til breytinga á samþykktum skulu hafa borist stjórn sjóðsins einum mánuði fyrir ársfund/sjóðfélagafund og ber að geta þeirra í fundarboði.
8.2 Samþykktum þessum má breyta með samþykki 2/3 greiddra atkvæða. Sjóðfélagar sem eiga inneign í séreignarsjóði hafa einir atkvæðisrétt um 3. kafla samþykktanna. Sjóðfélagar sem eiga réttindi í samtryggingarsjóði hafa einir atkvæðisrétt um 4. og 6. kafla samþykktanna. Atkvæðisréttur sjóðfélaga reiknast eftir inneign þeirra í séreignarsjóði og/eða hlutfallslegri inneign í samtryggingarsjóði (hlutfallsleg skipting eigna miðað við áfallin réttindi) miðað við næstliðin áramót. Hámarksatkvæðisréttur skal miðast við 50.000.000 kr. inneign. Fjárhæðin er verðtryggð og breytist árlega í hlutfalli við breytingar á vísitölu neysluverðs miðað við grunnvísitölu 239,0 stig í janúar 2005.
8.3. Ef sjóðfélagi getur ekki mætt á sjóðfélagafund vegna veikinda eða annarra lögmætra forfalla getur hann gefið öðrum umboð til að fara með atkvæðisrétt sinn. Umboðið þarf að vera skriflegt og vottfest af tveimur vitundarvottum og bundið við tiltekinn fund.
9. grein. Fjárfestingarheimildir
9.1 Stjórn Almenna lífeyrissjóðsins skal móta fjárfestingarstefnu og ávaxta fé sjóðsins með hliðsjón af þeim kjörum sem best eru boðin á hverjum tíma með tilliti til ávöxtunar og áhættu. Stjórnin skal ávaxta fé sjóðsins með tilliti til heimilda í VII. kafla laga um skyldutryggingu lífeyrisréttinda og starfsemi lífeyrissjóða nr. 129/1997 með síðari breytingum.
9.2 Stjórn er óheimilt að tilnefna fulltrúa í stjórn hlutafélaga sem lífeyrissjóðurinn á hlut í og taka þátt í stjórnarkjöri nema brýn nauðsyn krefur vegna hagsmuna sjóðsins og stjórn sjóðsins samþykkir.
9.3 Stjórn skal útbúa sérstakar reglur um lán til sjóðfélaga.
