Umsóknarréttur
Umsækjendur þurfa að vera virkir sjóðfélagar (hafa greitt iðgjöld síðustu 3 mánuði í samtryggingarsjóð en þeir sem eingöngu greiða í séreignarsjóð þurfa að hafa greitt í sex mánuði) eða hafa greitt til sjóðsins í 3 ár og eiga inneign eða réttindi í sjóðnum eða eru lífeyrisþegar hjá sjóðnum.
Hafi sjóðfélagi misst rétt á að sækja um lán vegna tímabundinnar fjárveru af vinnumarkaði þá stofnast réttur til að sækja um lán ef viðkomandi hefur greitt a.m.k. 200.000 kr. til sjóðsins af launum eða reiknuðu endurgjaldi og er með gildan ráðningarsamning þar sem tilgreint er að sjóðfélagi sé aftur farin að greiða iðgjöld til Almenna lífeyrissjóðsins.
Lánsfjárhæð
Allt að 35 milljónum og er háð veðskilmálum. Aldrei skal lánsfjárhæð vera hærri en svo að viðbótarlán að viðbættum eftirstöðvum eldri lána frá lífeyrissjóðnum uppreiknuðum með verðbótum sé hærri en 35 milljónir.
Vextir
Lán til sjóðfélaga geta verið með föstum eða breytilegum vöxtum.
Lánin með föstum vöxtum
Lánin eru verðtryggð og bera fasta 4,4% vexti. Fastir vextir eru ákvarðaðir af stjórn sjóðsins.
Lán með breytilegum vöxtum
Lánin eru verðtryggð og breytast vextir lánanna 15. hvers mánaðar. Vextir taka mið af meðalávöxtun á skuldabréfaflokki Íbúðarlánasjóðs HFF150434 í viðskiptakerfi Kaupphallar Íslands undangenginn mánuð að viðbættu 0,5% álagi. Vextirnir verða þó aldrei lægri en sú vaxtaviðmiðun sem lífeyrissjóðir nota við núvirðisreikning væntanlegs lífeyris (3,5%) og framtíðariðgjalda samkvæmt 19. gr. reglugerðar nr. 391/1998 um skyldutryggingu lífeyrisréttinda og starfsemi lífeyrissjóða að viðbættu 0,25% álagi.
Verði skuldaraskipti á láninu og nýr skuldari er ekki sjóðfélagi bætist við fast vaxtaálag sem er 1 prósentustig. Flytji sjóðfélagi inneign sína úr séreignasjóði Almenna lífeyrissjóðsins til annars vörsluaðila og á ekki réttindi í samtryggingardeild sjóðsins hækka vaxtakjör á lánum sem hann hefur fengið hjá sjóðnum um 1%. Flytji sjóðfélagi meira en 25% af inneign sinni úr séreignasjóði Almenna lífeyrissjóðsins til annars vörsluaðila og á ekki réttindi í samtryggingardeild sjóðsins hækka vaxtakjör á lánum sem hann hefur fengið hjá sjóðnum um 1%.
Veðskilmálar
Íbúðarhúsnæði
Fasteignaveð þarf að vera til tryggingar láninu. Veðsetning langtímalána getur verið allt að 75% af metnu markaðsverði íbúðarhúsnæðis. Veðsetning má þó aldrei vera hærri en 90% af brunabótamati nema lögð sé fram viðbótarbrunatrygging og þurfa skilmálar tryggingarinnar að vera þannig að henni verði ekki sagt upp nema með samþykki sjóðsins.
Ef lánsfjárhæð er hærri en 35% af metnu markaðsverði íbúðar skal lánið hvíla á fyrsta veðrétti. Ef sjóðfélagi hefur áður fengið lán hjá sjóðnum og sækir um viðbótarlán með sama veði og samanlögð veðsetning fer yfir 35% verður nýtt lán að vera á fyrsta veðrétti og eldra lán að vera innan 75% veðmarka.
Atvinnuhúsnæði
Ef um atvinnuhúsnæði er að ræða er hámarkslán 12 milljónir og má veðsetning með umbeðnu láni vera mest 35% af metnu markaðsverði. Veðsetning má þó aldrei vera hærri en 90% af brunabótamati.
Sumarhús
Ef veðsett eign er sumarhús er hámarkslán 12 milljónir og verður lánið að hvíla á fyrsta veðrétti. Veðsetning með umbeðnu láni má vera mest 35% af metnu markaðsverði eða brunabótamati og gildir það mat sem lægra er.
Þar sem sumarhús eru oft yfirgefin í langan tíma er farið fram á að sumarhús séu tryggð fyrir öðrum tjónum en brunatjóni, t.d. gegn vatnstjóni, innbroti o.s.frv. Gerð er krafa að lántakendur sendi einu sinni á ári afrit af tryggingaskírteini sínu en sé það ekki gert hefur lífeyrissjóðurinn heimild til að gjaldfella lánið.
Greiðslumat
Með umsókn um lán skal fylgja greiðslumat sem framkvæmd hefur verið af banka eða sparisjóði. Umsækjandi verður að standast greiðslumat þannig að sýnt sé að hann geti greitt af skuldbindingum sínum.
Veðsett eign
Fasteignaveð þarf að vera í eigu lántaka eða liggja fyrir þinglýstur kaupsamningur þar sem lántakandi er aðili að og mun eignast viðkomandi eign.
Lánstími
Lánstími getur verið allt að 40 ár og að lágmarki 5 ár. Ef veðsett eign er sumarhús getur lánstími verið allt að 15 ár en ef sumarhúsið er á leigulóð getur lánstími þó aldrei verið lengri en gildistími lóðarleigusamnings.
Gjalddagar
Gjalddagar eru minnst fjórir á ári. Þeir geta líka verið fleiri eftir óskum lántakenda. Lántakendur greiða kostnað af greiðslu afborgana.
Uppgreiðsla
Heimilt er að greiða lánin upp hvenær sem er án uppgreiðslugjalds.
Kostnaður
Lántökugjald er 0,5%. Stimpilgjald er 1,5% af lánsfjárhæð. Kostnaður fyrir að útbúa skuldabréf er kr. 2.800. Lántakandi greiðir þinglýsingargjald.
Afhending umsókna
Umsókn ásamt fylgiskjölum á að skila á skrifstofu Almenna lífeyrissjóðsins að Borgartúni 25, Reykjavík.
Afgreiðslutími
Gera má ráð fyrir að afgreiðsla lánsumsókna taki um viku, þó svo að leitast verði við að afgreiða umsóknir innan þriggja daga. Lán til sjóðfélaga eru afgreidd eftir því sem umsóknir berast. Gera má ráð fyrir að afgreiðsla breytinga á skuldabréfum geti tekið 7-10 daga en reynt er að afgreiða þær innan viku.
Almennur fyrirvari
Almenni lífeyrissjóðurinn áskilur sér rétt til að hafna lánsbeiðnum og/eða breytingum á skilmálum þrátt fyrir að öll skilyrði séu uppfyllt.
Samþykkt af stjórn 23.nóvember 2011.
