Bólusett ávöxtun – Almenni
  • Skyldusparnaður
  • Viðbótarsparnaður
  • Ávöxtun
  • Lán
  • Launagreiðendur
  • Almenni Pension Fund
  • Investment plans
  • Loans
  • About Almenni

Bólusett ávöxtun

15. janúar 2021

Bólusett ávöxtun

Góð ávöxtun í heimsfaraldri

Árið 2020 verður lengi í minnum haft þar sem heimsfaraldur geisaði og hafði mikil áhrif á hagkerfi heimsins. Miklar sveiflur voru á verðbréfamörkuðum, árið fór vel af stað en í lok febrúar fór að gæta áhrifa af COVID-19 á fjármálamörkuðum og var skörp lækkun bæði á innlendum og erlendum hlutabréfamörkuðum en í lok mars snéru markaðir hratt til baka. Þegar upp var staðið var góð ávöxtun á innlendum og erlendum mörkuðum á árinu. Allar ávöxtunarleiðir Almenna lífeyrissjóðsins nutu góðs af hagstæðri þróun á mörkuðum og skiluðu jákvæðri raunávöxtun. Ævisafn I hækkaði mest eða um 16% sem jafngildir um 12,1% raunávöxtun.

Heimsvísitala erlendra hlutabréfa MSCI hækkaði um 15,9% í USD sem jafngildir um 21,8%  hækkun í íslenskum krónum þar sem krónan veiktist gagnvart USD á árinu. Heimsvísitala erlendra hlutabréfa MSCI hefur hækkað um 9,9% í USD að meðaltali á ári síðastliðin 10 ár og um 11% í krónum yfir sama tímabil. Einnig var góð ávöxtun á innlendum hlutabréfamarkaði og hækkaði heildarvísitala aðallista um 25,9% á árinu. Heildarvísitala innlendra hlutabréfa hefur hækkað um 14,7% á ári að jafnaði síðastliðin tíu ár.

Ávöxtun á innlendum skuldabréfamarkaði var einnig góð, einkum vegna lækkunar á ávöxtunarkröfu langra skuldabréfa. Innlendur skuldabréfamarkaður hefur því skilað góðum gengishagnaði sem bætist við ávöxtun skuldabréfanna. Um tíma var raunávöxtunarkrafa langra verðtryggðra ríkisskuldabréfa neikvæð en í lok árs hafði hún hækkað aftur í u.þ.b. 0,5%. Vísitala Kauphallarinnar fyrir 10 ára löng verðtryggð skuldabréf hækkaði um 6% og vísitala Kauphallarinnar fyrir 10 ára löng óverðtryggð skuldabréf um 5,4%. Vísitala langra verðtryggðra skuldabréfa hefur hækkað um 7,9% að jafnaði á ári síðastliðin tíu ár.

Sjóðstjórar Almenna lífeyrissjóðsins munu fara yfir ávöxtun ársins á upplýsingafundi í lok janúar.

 

Upplýsingar um afkomu ávöxtunarleiða Almenna lífeyrissjóðsins:

Blönduð söfn Ávöxtun blandaðra ávöxtunarleiða, þ.e. Ævisafna I, II, III og samtryggingarsjóðs var frá        8,3% til 16%. Hækkun á erlendum og innlendum hlutabréfamörkuðum hafði mest áhrif til hækkunar á gengi safnanna.
Ríkissafn langt Ríkissafn langt hækkaði um 5,5%. Lækkun á ávöxtunarkröfu langra verðtryggðra skuldabréfa og hækkun á vísitölu neysluverðs skýra að mestu ávöxtun safnsins.
Ríkissafn stutt Ríkissafn stutt hækkaði um 4,7%. Lækkun á ávöxtunarkröfu óverðtryggðra skuldabréfa skýrir að mestu ávöxtun safnsins.
Innlánasafn Innlánasafnið hækkaði um 4%. Safnið ávaxtar eignir sínar á bundnum innlánsreikningum og vega verðtryggð innlán um 93% af eignum safnsins.
Húsnæðissafn Húsnæðissafnið hækkaði um 4,9%. Safnið ávaxtar eignir sínar að mestu í veðskuldabréfum, innlánum og í stuttum óverðtryggðum ríkisskuldabréfum.

Góð eignadreifing        

Ávöxtun verðbréfasafna ræðst af eignasamsetningu og ávöxtun einstakra verðbréfaflokka. Almenni lífeyrissjóðurinn leggur mikla áherslu á góða eignadreifingu til að draga úr heildaráhættu safnanna. Sjóðurinn birtir mánaðarlega upplýsingar um ávöxtunarleiðir þar sem meðal annars má lesa um eignasamsetningu. Smellið hér til að skoða upplýsingablöðin. Sjóðurinn birtir einnig ítarlegar upplýsingar um ávöxtun og sveiflur á heimasíðu, sjá nánar hér.

 

Skráðu þig á póstlistann

Fáðu fyrstur fréttirnar um viðburði og annað er viðkemur lífeyrismálum og starfsemi sjóðsins.