Góð ávöxtun á kosningaárinu mikla

Það má segja að árið 2024 hafi verið farsælt fyrir fjárfesta. Helstu markaðir sem Almenni lífeyrissjóðurinn fjárfestir á skiluðu góðri ávöxtun. Blandaðar ávöxtunarleiðir hækkuðu mest og var nafnávöxtun þeirra á bilinu 10% til 13,8%. Hæst var ávöxtunin í Ævisafni I sem hækkaði um 13,8% sem samsvarar 8,7% raunávöxtun.

Heimsvísitala erlendra hlutabréfa MSCI hækkaði um 18,7% í dollurum eða um 20,4% í íslenskum krónum þar sem krónan gaf eftir gagnvart dollara á árinu. Nokkrar sveiflur voru á erlendum hlutabréfamörkuðum á árinu 2024. Árið fór vel af stað og voru töluverðar hækkanir fram yfir mitt ár. Hökt kom í markaðinn seinnipart júlímánaðar en þær lækkanir gengu hratt til baka í ágúst. Ávöxtun á erlendum hlutabréfamörkuðum hefur að jafnaði verið góð undanfarin ár og heimsvísitala erlendra hlutabréfa MSCI hefur hækkað að jafnaði um 11,2% í dollurum síðastliðin fimm ár sem samsvarar um 14,2% árlegri nafnávöxtun í íslenskum krónum.

Innlendur hlutabréfamarkaður fór vel af stað í upphafi síðasta árs en hækkanir á fyrstu vikum ársins gengu hratt til baka, markaðurinn náði ákveðnum botni um miðjan september og hafði þá lækkað um 5% frá áramótum. Um miðjan september fór bjartsýni að aukast. Markaðsaðilar voru þá orðnir nokkuð bjartsýnir á að sameining fyrirtækjanna JBT og Marel gengi eftir. Seðlabankinn hóf svo vaxtalækkunarferli sitt í byrjun október og jákvæðar fréttir bárust frá skráðum fyrirtækjum. Þetta leiddi til þess að síðasti ársfjórðungur var gjöfull á innlendum hlutabréfamarkaði og hækkaði heildarvísitala aðallista um 14,7% yfir árið í heild. Innlendi hlutabréfamarkaðurinn hefur skilað ágætri ávöxtun undanfarin fimm ár og hækkað að jafnaði um 12,4% á ári.

Seðlabanki Íslands hóf vaxtalækkunarferli sitt í október 2024 eins og áður sagði, en þá höfðu stýrivextir verið óbreyttir í 9,25% frá því í ágúst 2023. Markaðsaðilar voru orðnir langþreyttir á biðinni eftir lækkun stýrivaxta en væntingar höfðu verið um að stýrivextir yrðu lækkaðir á fyrri hluta ársins. Ávöxtunarkrafa á markaði lækkaði í upphafi árs en sú lækkun var að mestu gengin til baka um mitt ár. Seðlabankinn lækkaði fyrst stýrivexti í október um 0,25 prósentustig og svo um 0,5 prósentustig í nóvember og voru stýrivextir í árslok 8,5%. Skuldabréfamarkaðurinn skilaði ágætri ávöxtun yfir árið og hækkaði vísitala Nasdaq Iceland fyrir 10 ára löng verðtryggð skuldabréf um 7,1% og vísitala Nasdaq Iceland fyrir 10 ára óverðtryggð skuldabréf hækkaði um 6,2% á árinu.

Horfur í upphafi árs 2025 eru nokkuð blandaðar. Verðbólga hefur hjaðnað í mörgum löndum sem ætti að gefa rými fyrir vaxtalækkun. Nýr forseti tekur við í Bandaríkjunum í janúar og nokkur óvissa er um stefnubreytingu nýrra ráðamanna og  hver áhrifin geta orðið á hagkerfi heimsins.  Ágætis hagvöxtur er í Bandríkjunum og markaðsaðilar reikna nú með að lengra verði í frekari vaxtalækkanir Seðlabanka Bandaríkjanna en áður var reiknað með. Áfram eru stríðsátök í Úkraínu og fyrir botni Miðjarðarhafs að valda áhyggjum. Á Íslandi er óvissa vegna jarðhræringa víða á landinu sem gæti haft nokkur áhrif á hagkerfið. Ný ríkisstjórn boðar auðlindagjöld á sjávarútveg og ferðamannaiðnað sem veldur óvissu fyrir stærstu útflutningsgreinarnar og getur dregið úr fjárfestingum.  Á móti kemur að mikill kraftur er í hagkerfinu og langtímahorfur eru góðar. Nú, sem fyrr, er vænlegt fyrir langtímafjárfesta að halda sjó og ávaxta eignir í blönduðum verðbréfasöfnum sem leggja áherslu á góða eigna- og áhættudreifingu.

Góð eignadreifing
Ávöxtun verðbréfasafna ræðst af eignasamsetningu og ávöxtun einstakra verðbréfaflokka. Almenni lífeyrissjóðurinn leggur mikla áherslu á góða eignadreifingu til að draga úr heildaráhættu safnanna. Sjóðurinn birtir mánaðarlega upplýsingar um ávöxtunarleiðir þar sem meðal annars má lesa um eignasamsetningu. Smellið hér til að skoða upplýsingablöðin. Sjóðurinn birtir einnig ítarlegar upplýsingar um ávöxtun og sveiflur á heimasíðu, sjá nánar hér.