Um ávöxtunarleiðir
45% skylduiðgjalds og allur viðbótarlífeyrissparnaður fer í séreignarsjóð og geta sjóðfélagar valið á milli sjö stakra ávöxtunarleiða auk Ævileiðarinnar. Iðgjald greitt í samtryggingarsjóð er ávaxtað í sérstöku eignasafni.
- Ævisöfn I, II og III eru blönduð verðbréfasöfn með skuldabréfum, hlutabréfum og innlánum.
- Eignasamsetning safnanna er mismunandi og er ráðlegging okkar að sjóðfélagar greiði í söfnin eftir aldri þannig að vægi skuldabréfa aukist með aldrinum.
- Í Ævileiðinni er inneign flutt milli ævisafnanna eftir aldri.
- Erlent verðbréfasafn fjárfestir um 70% í erlendum hlutabréfum og um 30% í erlendum skuldabréfum
- Innlánasafnið fjárfestir eingöngu í innlánum.
- Ríkissafn fjárfestir í ríkisskuldabréfum og innlánum.
- Skuldabréfasafnið fjárfestir í vel dreifðu innlendu skuldabréfasafni.
Ævileiðin
Ævileiðin byggir á því að inneign sjóðfélaga er ávöxtuð í verðbréfasöfnum sem taka mið af aldri sjóðfélaga. Þar er ævinni skipt í þrjá hluta:
- Fram til 44 ára aldurs er inneign ávöxtuð í Ævisafni I.
- Á aldrinum 45 til 48 ára flyst inneign í jöfnum áföngum í Ævisafn II þar sem inneignin er ávöxtuð frá 45 til 56 ára aldurs.
- Á aldrinum 57 til 60 ára flyst inneign í jöfnum áföngum í Ævisafn III þar sem inneign er ávöxtuð frá 57 ára aldri.
- Í Ævileiðinni er inneign flutt á milli safna eftir aldri sjóðfélaga, án kostnaðar.
- Almenni mælir með að sjóðfélagar velji sér safn eftir áhættuþoli sem ræðst meðal annars af ávöxtunartíma. Ævileiðin hentar því fyrir flesta.
- Í Ævileiðinni er innbyggð áhættudreifing sem felst í því að hlutfall hlutabréfa lækkar með aldri sjóðfélaga um leið og vægi skuldabréfa fer vaxandi.
Ævisafn I
Ævisafn I hentar þeim sem eru að ávaxta lífeyrissparnað sinn til langs tíma.
- Mælt er með Ævisafni I fyrir sjóðfélaga á aldrinum 16-44 ára.
- Ávöxtunartími inneignar í þessu safni er að jafnaði 15-20 ár.
- Markmið safnsins er langtímahækkun eigna með því að fjárfesta um 70% af eignum í hlutabréfum.
- Búast má við miklum sveiflum í ávöxtun safnsins en á löngum tíma er reiknað með að sjóðfélögum verði umbunað fyrir sveiflurnar með hærri ávöxtun.
Eignir og fjárfestingarstefna
* framtaksfjárfestingar eru taldar með þeim eignaflokkum sem við á m.v. undirliggjandi eignir þeirra
Ævisafn II
Ævisafn II hentar þeim sem eru að ávaxta lífeyrissparnað sinn til langs tíma.
- Mælt er með Ævisafni II fyrir sjóðfélaga á aldrinum 45-56 ára.
- Ávöxtunartími inneignar í þessu safni er að jafnaði 10-15 ár.
- Markmið safnsins er langtímahækkun eigna með fjárfestingum í skuldabréfum sem vega um 45% í stefnu og hlutabréfum sem vega um 55% í stefnu safnsins.
- Búast má við nokkrum sveiflum í ávöxtun safnsins en á löngum tíma er reiknað með að sjóðfélögum verði umbunað fyrir sveiflurnar með hærri ávöxtun.
Eignir og fjárfestingarstefna
* framtaksfjárfestingar eru taldar með þeim eignaflokkum sem við á m.v. undirliggjandi eignir þeirra
Ævisafn III
Ævisafn III hentar fyrir sjóðfélaga sem eiga stutt í eftirlaun eða eru byrjaðir að ganga á inneign sína.
- Mælt er með Ævisafni III fyrir sjóðfélaga sem eru 57 ára og eldri.
- Ávöxtunartími inneignar í þessu safni er að jafnaði 5-20 ár.
- Markmið safnsins er langtímahækkun eigna með því að fjárfesta um 70% í skuldabréfum og innlánum. Með auknu vægi skuldabréfa er stefnt að minni sveiflum en í Ævisöfnum I og II en um leið má búast við lægri ávöxtun til lengri tíma litið.
- Búast má við nokkrum sveiflum í ávöxtun safnsins, en áhersla á fjárfestingu í skuldabréfum skilar jafnari ávöxtun.
Eignir og fjárfestingarstefna
* framtaksfjárfestingar eru taldar með þeim eignaflokkum sem við á m.v. undirliggjandi eignir þeirra
Erlent verðbréfasafn
- Góð áhættudreifing á eignaflokka, lönd og atvinnugreinar einkennir undirliggjandi eignir safnsins en þrátt fyrir það má búast við talsverðum sveiflum í ávöxtun.
- Safnið fjárfestir að mestu í skráðum verðbréfum en einnig að hluta í óskráðum verðbréfum.
- Að jafnaði eru fjárfestingar safnsins í erlendum verðbréfum gerðar með milligöngu sjóða, bæði verðbréfasjóða og sérhæfðra sjóða.
- Markmið safnsins er langtímahækkun eigna með því að fjárfesta í erlendum hlutabréfum sem vega um 70% í stefnu og erlendum skuldabréfum sem vega um 30% í stefnu safnsins.
- Talsverðar verðsveiflur geta orðið á erlendum verðbréfamörkuðum og þá hafa breytingar á gengi erlendra gjaldmiðla einnig áhrif á uppgjörsvirði eigna safnsins.
Eignasamsetning
Innlánasafn
Innlánasafnið hentar þeim sem vilja ávaxta inneign sína eingöngu í bankainnlánum.
- Ávöxtun er sambærileg og ávöxtun á verðtryggðum bankareikningum með hæstu vöxtum á hverjum tíma.
- Vextirnir breytast með almennu vaxtastigi í landinu.
- Stefnt er að því að dreifa eignum Innlánasafnsins á 3 til 4 innlánastofnanir.
- Innlánasafnið er fyrir sjóðfélaga sem vilja ávaxta inneign sína í bankainnlánum.
- Breytingar á markaðsvöxtum hafa ekki áhrif á höfuðstól innlána og því eru gengissveiflur mjög litlar. Safnið hentar vel fyrir þá sem eru að ganga á inneign sína eða hyggjast gera það á næstunni.
- Inneignir sjóðfélaga í Innlánasafninu falla undir ákvæði laga nr. 98/1999 um innstæðutryggingar.
Eignasamsetning
Skuldabréfasafn
Skuldabréfasafn hentar þeim sem vilja dreift safn innlendra skuldabréfa með tiltölulega litlum sveiflum og sem er að stórum hluta verðtryggt.
- Skuldabréfasafn fjárfestir í vel dreifðu innlendu skuldabréfasafni, bæði ríkisskuldabréfum, sértryggðum skuldabréfum, sveitarfélagabréfum, fyrirtækjaskuldabréfum og veðskuldabréfum.
- Safnið hentar þeim sjóðfélögum sem kjósa góða áhættudreifingu á innlendum skuldabréfamarkaði, jafna ávöxtun og tiltölulega litlar sveiflur.
- Gert er ráð fyrir því að sveiflur í ávöxtun safnsins verði að jafnaði litlar. Stór hluti safnsins er í dreifðum markaðsskuldabréfum með tiltölulega stuttan meðallíftíma (viðmið fyrir meðaltíma er 2,5 ár) og jafnframt er gert ráð fyrir að hluti safnsins séu veðskuldabréf sem gerð eru upp m.v. vaxtakjör bréfanna (uppgreiðsluverðmæti) og taka því ekki hefðbundnum markaðssveiflum.
Eignasamsetning
Ríkissafn
Ríkissafn hentar þeim sem vilja ávaxta inneign sína í ríkisskuldabréfum.
- Ríkissafnið fjárfestir í ríkisskuldabréfum með meðallangan líftíma og hentar sjóðfélögum sem eru 57 ára og yngri, þola sveiflur í ávöxtun og vilja ávaxta lífeyrissparnað sinn að stærstum hluta í ríkisskuldabréfum.
- Safnið hefur einnig heimild til að fjárfesta að hluta í bankainnlánum.
- Áætlaður meðaltími safnsins er 3 til 8 ár og safnið fjárfestir í skuldabréfum með ábyrgð ríkisins sem eru að hluta verðtryggð.
- Jafnvel þó að um skuldabréf sé að ræða sem talin eru traust, eins og ríkisskuldabréf geta sveiflur orðið miklar í ávöxtun við vaxtabreytingar á markaði.
Eignasamsetning
Samtryggingarsjóður
Sjóðfélagar greiða 8,5% af launum sem hluta af lágmarksiðgjaldi í samtryggingarsjóð og ávinna sjóðfélagar sér rétt á ævilöngum ellilífeyrisgreiðslum frá 70 ára aldri, örorku- og barnalífeyri við starfsorkumissi og maka- og barnalífeyri til eftirlifandi maka og barna við fráfall.
- Samtryggingarsjóður fjárfestir í innlendum og erlendum verðbréfum og stefnir að langtímahækkun eigna með fjárfestingum í skuldabréfum sem vega um 45% í stefnu og hlutabréfum sem vega um 55% í stefnu sjóðsins.
- Eignir samtryggingarsjóðs eru ávaxtaðar í sérgreindu verðbréfasafni og er markmið þess að sjóðurinn eigi ávallt fyrir skuldbindingum og skili á löngum tíma ávöxtun umfram viðmiðunarávöxtun (3,5% raunávöxtun).
- Fjárfestingarstefna samtryggingarsjóðsins tekur mið af réttindakerfi, lífeyrisbyrði, aldurssamsetningu sjóðfélaga og áætluðu framtíðargreiðsluflæði vegna lífeyrisskuldbindinga sjóðsins.
- Nánar um réttindi í samtryggingarsjóði má lesa hér.
Eignir og fjárfestingarstefna
* framtaksfjárfestingar eru taldar með þeim eignaflokkum sem við á m.v. undirliggjandi eignir þeirra
Gjaldskrá vegna breytinga á ávöxtunarleið
Verðskrá vegna flutninga á milli safna
- Enginn kostnaður er greiddur af flutningi á milli safna samkvæmt Ævileiðinni.
- Fyrir flutning á inneign á milli ávöxtunarleiða annarra en Innlánasafns er greitt 0,1% af fluttri inneign.
- Fyrir flutning á inneign á milli ávöxtunarleiða og Innlánasafns er greitt 0,05% af fluttri inneign.